Şahbulaq qalasında aparılan bərpa-quruculuq işləri ilə tanışlıq

Azərbaycan Respublikasının Prezidenti İlham Əliyev mayın 28-də Ağdama səfəri zamanı tarixi Şahbulaq qalasında olmuşdur. Dövlətimizin başçısına abidənin yenidənqurma planı təqdim edilmiş və bərpa-quruculuq işləri barədə məlumat verilmişdir.

XVIII əsrə aid bu qala Qarabağ ərazisindəki ən məşhur tarixi abidələrdən biridir. Ağdam şəhərindən təxminən 10 kilometr məsafədə, Şahbulaq kəndi yaxınlığında yerləşən qala 1751–1752-ci illərdə Qarabağ xanlığının banisi Pənahəli xanın göstərişi ilə inşa edilmişdir. Elmi ədəbiyyatda “Şahbulaq qəsri” adı ilə tanınan abidə, əslində, yaşayış evləri, bazar, hamam və məsciddən ibarət iri qəsr kompleksinin iç qalası olmuş, Şuşa qalasının inşasınadək Şahbulaq qalasından Qarabağ xanlığının inzibati mərkəzi kimi istifadə edilmişdir. Ermənilərin Ağdamı işğal etməsindən sonra bir sıra abidələrimiz kimi Şahbulaq qalası da saxtalaşdırma cəhdlərinə məruz qalmış, yaxınlıqdakı məscid isə kilsə kimi təqdim edilmişdir.