Cıdır düzündə ağacəkmə aksiyası

Azərbaycanın mədəniyyət paytaxtı, Qarabağın tacı olan Şuşanın düşmən tapdağından azad edilməsi tarixi Qələbəmizin simvoludur. İşğaldan azad olunmuş ərazilərdə son bir ildə Azərbaycan Respublikasının Prezidenti İlham Əliyevin rəhbərliyi ilə aparılan bərpa-quruculuq işləri yenidən bu yerlərə həyat verir, ermənilərin ekoloji sistemə vurduqları ziyan aradan qaldırılır.

Xalqımızı möhtəşəm Qələbəyə aparan 44 günün şərəfinə ölkə üzrə 44 min ağac əkilməsi aksiyası keçirilmişdir. Aksiya çərçivəsində Prezident İlham Əliyev və birinci xanım Mehriban Əliyeva noyabrın 8-də Cıdır düzündə ağac əkmişdirlər.

İşğaldan azad olunan ərazilərdə ekoloji tarazlığın bərpası istiqamətində görülən tədbirlər Topxana meşəsini də əhatə edir. Heydər Əliyev Fondunun layihəsi çərçivəsində “Regional İnkişaf” İctimai Birliyinin könüllüləri tərəfindən Topxana meşəsində də ağacəkmə aksiyası keçirilmiş, 3 hektar əraziyə dağdağan, göyrüc, saqqızağacı, qarağac əkilmiş, əraziyə 100 kiloqram palıd toxumu səpilmişdir.