Ağdam şəhər 1 saylı məktəbin yeni binasının təməlqoyma mərasimi

Azərbaycan Respublikasının Prezidenti İlham Əliyev mayın 28-də Ağdam şəhər 1 saylı məktəbin yeni binasının təməlini qoymuşdur.

Sözügedən məktəb Qarabağ bölgəsinin ən qədim təhsil ocaqlarından biri hesab olunur. Onun əsası 1883-cü ildə Əsgər bəy Eyvazov tərəfindən qoyulmuş və 1904-cü ildən etibarən bu ərazidə fəaliyyət göstərmişdir. Bina 1993-cü ildə erməni işğalı zamanı tamamilə dağıdılmışdır.

Yeni layihəyə əsasən məktəb üçmərtəbəli olacaq, inzibati hissə, tədris korpusları, idman meydançası və texniki zona inşa ediləcəkdir. Binada 18 sinif otağı, 37 fənn kabineti, kimya, fizika və biologiya laboratoriyaları yaradılacaq, ümumilikdə 960 şagird üçün müasir tədris şəraiti təmin ediləcəkdir.