Yeni Şuşa məscidində aparılan tikinti işləri ilə tanışlıq

Azərbaycan Respublikasının Prezidenti İlham Əliyev və Türkmənistan Xalq Məsləhətinin sədri Qurbanqulu Berdiməhəmmədov iyulun 17-də Yeni Şuşa məscidində tikinti işlərinin gedişi ilə tanış olmuşdurlar.

Təməli 2021-ci ildə dövlətimizin başçısı tərəfindən qoyulan və memarlıq həlli rəmzi xarakter daşıyan məscid tarixi şəhərdə modern memarlıq nümunəsi kimi seçiləcəkdir. Prezident İlham Əliyevin tapşırığına əsasən məscidin forması 8 rəqəmini əks etdirəcəkdir. Bu da öz növbəsində Şuşanın işğalçılardan azad olunduğu günü – Zəfər Gününü təcəssüm etdirəcəkdir. Məscidin iki minarəsi isə 11 rəqəmi formasında olacaqdır. Bu isə Şuşanın və Qarabağın işğaldan ilin on birinci ayında azad edilməsinin rəmzidir. Minarələrinin hündürlüyü 72 metr olacaq məscid Şuşanın yuxarı hissəsində inşa edilir. Bu ibadət ocağının binasının xarici səthi Şuşanın qədim məscidinin minarələrində istifadə edilən həndəsi naxışlarla bəzədiləcəkdir.

Hazırda işlərin 60 faizindən çoxu həyata keçirilmişdir. Məscidin inşasının gələn il yekunlaşdırılması nəzərdə tutulmuşdur.