Tərtər rayonun Suqovuşan qəsəbəsindəki istirahət parkının açılış mərasimi

Azərbaycan Respublikasının Prezidenti İlham Əliyev oktyabrın 15-də Tərtər rayonuna səfəri zamanı Tərtər rayonunun Suqovuşan qəsəbəsində istirahət parkının açılışında iştirak etmişdir.

1970-ci illərdə ümummilli lider Heydər Əliyevin təşəbbüsü ilə tikilən Suqovuşan su anbarının ətrafında yaradılan parkda əhalinin asudə vaxtının səmərəli təşkili üçün sahilboyu gəzinti cığırları salınmış, oturacaqlar, söhbətgahlar, uşaqlar üçün əyləncə meydançası, idman qurğuları quraşdırılmışdır. Ərazisi 7,5 hektar olan parkda həmçinin turist informasiya mərkəzi, kafe, üzən estakada, turistlərə xidmət göstərəcək nəqliyyat vasitələri üçün avtodayanacaq yaradılmışdır. Burada geniş yaşıllaşdırma işləri görülmüş, 5 minə yaxın ağac və kol əkilmişdir. Suqovuşan istirahət parkının təməli 2022-ci il martın 20-də Azərbaycan Prezidenti İlham Əliyevin və birinci xanım Mehriban Əliyevanın iştirakı ilə qoyulmuşdur.