Qarabağ Universitetinin tələbə yataqxanasının təmirdən sonra açılış mərasimi

Azərbaycan Respublikasının Prezidenti İlham Əliyev sentyabrın 20-də Xankəndi şəhərində Qarabağ Universitetinin tələbə yataqxanasının təmirdən sonra açılışında iştirak etmişdir.

Tələbələrin yaşaması üçün nəzərdə tutulan yataqxana mənzil tipli 5 binadan ibarətdir. Binaların hamısı müasir standartlar səviyyəsində əsaslı təmir olunmuşdur. Bütün mənzillər müvafiq avadanlıqlarla təchiz edilmiş, yaşayış şərtləri müasir kampus konseptinə uyğunlaşdırılmışdır. Yataqxanada istirahət guşələri, yeməkxana və idman sahəsi də fəaliyyət göstərəcəkdir. Ümumilikdə 1154 tələbənin yataqxanada ödənişsiz əsaslarla məskunlaşması təmin edilmişdir.

Universitet şəhərciyində əməkdaşların və onların ailələrinin yaşaması üçün nəzərdə tutulan 4 binada isə ümumilikdə 186 mənzil mövcuddur. Bütün mənzillər əsaslı təmir olunmuş və müvafiq avadanlıqlarla təchiz edilmişdir. Hazırda 140-a qədər əməkdaşın və onların ailə üzvlərinin məskunlaşması təmin olunmuşdur. Əməkdaşların universitetdə çalışdıqları müddətdə həmin mənzillərdə ödənişsiz əsaslarla yaşaması nəzərdə tutulmuşdur.