Kolatağ kəndində fərdi evlərin və infrastrukturun bərpası işləri ilə tanışlıq

Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 21-də Ağdərə rayonunun Kolatağ kəndində fərdi evlərin və infrastrukturun bərpası sahəsində görülən işlərlə tanış olmuşdurlar.

Kənddəki 140 fərdi evdən 30-u yararsız, 110-u isə qismən yararlı olmuşdur. 26 fərdi ev artıq əsaslı bərpa edilmişdir. Avqustun 15-də 26 ailə, ümumilikdə isə 89 nəfər doğma Kolatağ kəndinə qayıtmışdır. Bu ilin oktyabr ayının sonunadək daha 26 evin bərpası, 2026-cı ildə isə 58 evin təmir və bərpası nəzərdə tutulmuşdur.

Hazırda kəndin müasir sosial infrastrukturunun qurulması istiqamətində işlər davam edir. 1 transformator və 1 kilometr uzunluğunda mövcud elektrik xətti təmir olunmuş, artezian quyusu bərpa edilmiş, 26 ev su ilə təmin olunmuşdur. Sentyabrda kəndin içməli su ilə təminatı tam başa çatdırılacaqdır. İndiyədək 10 min 600 poqonometr yeni qaz xətti çəkilmiş, əlavə olaraq isə 2800 poqonometr hissənin çəkilməsi nəzərdə tutulmuşdur.

Kənddə sakinlərin istirahəti və asudə vaxtlarının səmərəli təşkili üçün müasir istirahət parkı salınmışdır. Burada bayraq meydanı, idman və uşaq oyun meydançaları, rekreasiya zonası və yaşıllıq zolağı yaradılmışdır.