“İstisu” müalicə-istirahət kompleksində görülən işlərlə tanışlıq

Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 25-də Kəlbəcər rayonunda “İstisu” müalicə-istirahət kompleksində görülən işlərlə tanış olmuşdurlar.

Bərpa ediləcək “İstisu” müalicə-istirahət kompleksinin ümumi sahəsi 32 min kvadratmetr olacaqdır. Kompleksdə 145 nömrə, eləcə də 10 kottec yaradılacaqdır. Kompleksdəki spa mərkəzində isə termal hamam, müalicəvi vanna, həkim otağı, o cümlədən müxtəlif müalicəvi hovuzlar, prosedur otaqları, təzyiqli su terapiyası, masaj, buxar, duz otaqları, istirahət zonaları, gözəllik salonu mövcud olacaqdır. Burada müxtəlif iaşə obyektləri – restoranlar, uşaq əyləncə mərkəzi, oyun otağı, sportskafe, karaoke otağı, kafeteri də qonaqlara xidmət göstərəcəkdir.