Çapar kəndində görülmüş işlərlə tanışlıq

Azərbaycan Respublikasının Prezidenti İlham Əliyev yanvarın 13-də Ağdərə rayonunun Çapar kəndində görülmüş işlərlə tanış olmuşdur.

Çapar Ağdərə rayonunun İmarət Qərvənd kənd inzibati ərazi dairəsində, Qarabağ silsiləsinin cənub-şərq yamacında yerləşir. Burada qala və məbəd memarlıq abidələri vardır. Çapar kəndi Azərbaycan Silahlı Qüvvələrinin 2023-cü ildə həyata keçirdikləri antiterror əməliyyatı nəticəsində işğaldan azad edilmişdir.

Çaparda mövcud olan fərdi evlərin sayı 104-dür. Onlardan 41-i yararsız, 63-ü isə qismən yararlıdır. Evlərdən 40-ı artıq istismara hazırdır. İl ərzində daha 23 evin bərpa edilməsi planlaşdırılır. İlkin olaraq kəndə 26 ailə (96 nəfər) qayıtmışdır.

Kənddə sosial məsələlərin həlli ilə bağlı bir çox iş görülmüşdür. Belə ki, 3 ədəd mövcud transformator və elektrik xətti bərpa edilmiş, yeni elektrik, qaz və rabitə xətləri çəkilmiş, su şəbəkəsi yaradılmış, su anbarları bərpa olunmuşdur. Uzunluğu 6 kilometrə yaxın olan kənddaxili yollar yenidən qurulmuşdur. Kənddə yeni salınmış park da sakinlərin istifadəsinə veriləcəkdir.

Səfər çərçivəsində Prezident İlham Əliyev kəndə köçmüş Kəmalə Dadaşovanın ailəsinə baş çəkmiş və yaşayış şəraiti ilə maraqlanmışdır.