“Sadıqcanın evi”nin bərpadan sonra açılışı

Azərbaycan Respublikasının Prezidenti İlham Əliyev iyulun 11-də Şuşada tarix-memarlıq abidəsi olan “Sadıqcanın evi”nin bərpadan sonra açılışında iştirak etmişdir.

Sözügedən bina Şuşa şəhərinin işğalı dövründə uzun müddət baxımsız qalmış, nəticədə dam örtüyündə, döşəmələrdə və daş hörgülərdə ciddi aşınma və dağıntılar baş vermişdir. Tikilinin memarlıq elementlərinin bir hissəsi zədələnmiş, mühəndis-kommunikasiya sistemləri tamamilə yararsız vəziyyətə düşmüşdür. Prezident İlham Əliyevin 2022-ci ildə imzaladığı Sərəncama əsasən layihənin bərpası məqsədilə vəsait ayrılmış və 2024-cü ildə bərpa işlərinə başlanılmışdır.

Zirzəmi və iki mərtəbədən ibarət Sadıqcanın ev-muzeyi Şuşa şəhərinin Sadıqcan küçəsində yerləşir. Sivri tağlı pəncərələr və giriş qapısının nisbətən iri daşlarla işlənməsi memarlıq baxımından binaya xüsusi gözəllik verir. Sadıqcanın ev-muzeyi ölkə əhəmiyyətli tarix-memarlıq abidələri siyahısındadır. Ev-muzeydə Sadıqcanın həyat və yaradıcılığına, Azərbaycan milli musiqi irsinə və Şuşanın zəngin ədəbi-bədii mühitinə həsr olunmuş ekspozisiya sahələri, konsert zalı, muğam ekspozisiya otağı, həmçinin kafe, suvenir mağazası, qeydiyyat bölməsi və musiqi alətləri emalatxanası yaradılmışdır.

Tədbir zamanı dövlətimizin başçısına “Əbədiyyətin səsi” əsəri barədə məlumat verilmişdir. Bu heykəltəraşlıq əsəri Azərbaycanın milli musiqi aləti olan tarın rəmzi-bədii interpretasiyasıdır. Kompozisiyada tarın simlərindən doğan ağac obrazı musiqinin torpaqdan qaynaqlandığını, milli yaddaşdan güc aldığını və yenidən həyata çevrildiyini ifadə edir. Ağac forması kök, davamlılıq və dirçəliş ideyasını təcəssüm etdirir. Əsər Azərbaycanın musiqi beşiyi sayılan Şuşanın zəngin mədəni irsinə ithaf olunmuşdur. Əsərin müəllifi Əməkdar rəssam Rəşad Mehdiyevdir.